آخر تحديث: 4 نوفمبر 2026
زاد (ZAAD) منصة لطلب الأكل من مطاعم بلدك. هالصفحة بتشرح شو المعلومات اللي بنجمعها عنك، ليش، مع مين بنشاركها، وشو حقوقك.
شو بنجمع
- رقم موبايلك، لتسجيل الدخول وتأكيد الطلب.
- اسمك وعنوانك (المنطقة، الحارة، التفاصيل)، وموقعك على الخريطة إذا اخترت تحدده.
- تفاصيل طلباتك: الأصناف، الإضافات، الملاحظات، المبلغ وطريقة الدفع.
- إذا طلبت بالتلفون: المطعم بيسجّل رقمك واسمك وعنوانك ليوصلك الطلب، وليعرفك بالمرة الجاية.
- معلومات تقنية: ملفات تعريف (كوكيز) ضرورية لتسجيل الدخول واللغة، وسجلات أخطاء وأمان فيها عنوان IP لمنع إساءة الاستخدام، بتنمحى بعد 30 يوم.
- عدّ مجهول لخطوات الطلب (فتح المنيو، السلة، إتمام الطلب) برقم عشوائي للزيارة بس، بدون اسم أو رقم، لنعرف وين لازم نحسّن.
- تقييمك وتعليقك على الطلب، إذا قيّمت.
- بالتطبيق: رمز الإشعارات ولغة جهازك، إذا سمحت بالإشعارات، لنبعتلك تحديثات طلبك.
- المفضّلة بتنحفظ على جهازك بس.
ليش بنجمعها
- لتنفيذ طلبك وتوصيله من المطعم إلك.
- لتأكيد رقمك بكود على واتساب.
- لمنع الطلبات الوهمية والاحتيال (مثلاً حظر رقم بعد طلب وهمي).
- لتحسين الخدمة وحل المشاكل.
ما بنستعمل معلوماتك للإعلانات، وما بنبعتلك رسائل تسويقية. الرسالة الوحيدة اللي بتوصلك من زاد على واتساب هي كود الدخول.
مع مين بنشاركها
- المطعم اللي طلبت منه، وسائق التوصيل تبعه: اسمك، رقمك، عنوانك، تفاصيل الطلب والمبلغ، وتقييمك وتعليقك إذا قيّمت. التوصيل بيكون من المطعم نفسه.
- المطعم اللي بتتصل عليه من رقمك المسجل بزاد: اسمك، وعنوانك المحفوظ إذا بيوصّل لمنطقتك، عشان يسجّل طلبك أسرع.
- مزودي خدمة بيشغّلوا المنصة: استضافة الموقع وقاعدة البيانات، خدمة الواتساب لبعت كودات الدخول وتفاصيل التوصيل للسائق، خدمات الإشعارات (Expo و Apple و Google)، وخرائط OpenStreetMap.
ما بنبيع معلوماتك لحدا.
قديش بنحتفظ فيها
- العناوين المحفوظة بتنمحى لحالها بعد 90 يوم بدون استعمال.
- كودات الدخول بتنمحى خلال ساعات.
- سجلات المكالمات للمطعم بتنمحى بعد 7 أيام، وسجلات الأخطاء بعد 30 يوم.
- الطلبات بنحتفظ فيها للحسابات وحل الشكاوي.
حقوقك
بتقدر تطلب تشوف المعلومات اللي عنا عنك، تصحّحها أو تمحيها. تواصل معنا على واتساب 052-2799996.
لحذف حسابك بنفسك: www.zaad.si/delete-account، أو من التطبيق (حسابي ← حذف الحساب).
الأمان
المعلومات محفوظة بقاعدة بيانات محمية، والوصول إلها محدود: كل مطعم بيشوف طلباته بس، ولوحة الإدارة محمية بتحقق بخطوتين.
لمندوبي التوصيل (تطبيق مندوب زاد وصفحة التوصيل)
- اسمك ورقمك واسم الدخول بيسجّلهم صاحب المطعم، وكلمة المرور بتنحفظ مشفّرة.
- لما تكبس «احفظ موقعه» عند باب الزبون، موقعك بينحفظ كموقع للزبون مع اسمك والوقت.
- وقت ما يكون معك طلب بالطريق، موقعك الحالي بيوصل لزبون هالطلب وللمطعم صاحب الطلب حتى يتابعوك عالخريطة، حتى لو التطبيق بالخلفية. بنحفظ آخر نقطة بس، وبتنمحي لما يخلص آخر توصيل.
- بنحفظ الطلبات اللي وصّلتها وأوقاتها، والمطعم بيشوفها.
- إذا سمحت بالإشعارات: رمز الإشعارات ولغة التطبيق، لنبعتلك الطلبات الجديدة عبر Expo و Apple. الإشعار فيه رقم الطلب والمنطقة بس. الرمز بينمحى لما تسجّل خروج.
- تسجيل دخولك بينتهي لحاله بعد 60 يوم.
- معلومات الزبون اللي بتشوفها هي للتوصيل بس.
لتصحيح معلوماتك أو حذف حسابك: اطلب من صاحب المطعم، أو تواصل معنا على واتساب 052-2799996.
تغييرات
إذا غيّرنا هالسياسة، بنحدّث التاريخ فوق. الاستمرار باستعمال زاد يعني موافقتك على النسخة المحدّثة.